ARUSKIPAWI

ARUSKIPÄWI

QHATHUNA

Jose Luis Lima Mamani (Lingüística-UPEA) 2014.

R: Aski jayp’ukïpan jilata.

J:Jumatakis ukhamarak kullaka, akawjanrakis aljasitätaxa  kawkirus sarxpach sayätwa.

R: Janiw jilata, nayax sapa doming uru  ukhamarak jueves urunakaw aljasirïta.

J: Jan samt kullaka, ukatx akham isinakpunt aljirïta, jan ukax  yaqha yänak  aljarakirïtacha.

R:  Jïsa jilata, Nayax isinakakw aljirïta.

J: Ukhamax jichhürux  alax walt’atati.

R: Utjaskarakipï, ukampirus  juk’amp aljapunchiya.

J: Aljaskätaw  Kullaka.

R: Jumax janit isi alasiñ munkta, walja isinakaw jumatakjamax utjitu.

J: Jan samt kullata, nayax janiw  isis alasir jutkti, nayax uta yänak alasiriw jutta.

R: jilata alasitaya, aka lluch’ux  jiwakiwa, akham  jumatakjamawa.

J: Chiqapunirakisa,  ukampirus janiw  nayax lluch’  munktti.

R: Alasitay  Jilata, aham saltanakapas jiwakiwa.

J: Chiqaw kullaka, qawqhas chanipaxa.

R: Tunka payan waranqakiw jilata.

J:  Janit  yaqha saminikan lluch’us utjtam, uñacht’ayakitay kullaka alaschimaxa.

R: walikiw jilata, akanakakiw utjitu, aka mayax ch’umphimp ch’iyarampi, akarak laramamp janq’umpi, akchhirirak ch’umphimp janq’ump samiñcht’atawa.

J:  wali jiwanakakiw kullaka  ukampirus aka ch’umphimp janq’ump samiñcht’atakw alasïma.

R: janit yaqha isinakamp alaskitäta, akham kunayman isinakaw utjitu.

J: Walikiskaniw kullaka, yaqha yänak kunw alasiñäta.

R: ukhamax  uka lluch’ukxay  alaschitäta.

J: Jïsa kullaka, jichhax   chanip iraqt’itaya.

R: Tunka waranqar apasim jilata.

J: Walik kullaka akax paylläwipaxa. Mayäkanakan jutakirakïwa, niyaxay aljasiñam uñt’xstxa.

R: Jutakïtapiy  jilata, warmimarus irpanïtawa.

J:  iyaw kullaka, jayp’untitaspawa,  sarxä.

R: Jikisiñkam jilata.