POESIA AYMARA/ CHUYMAJARUKI AMUYAM

CHUYMAJARUKI  AMUYAM

Lima mamani Jose Luis [1](2013)

Qawqhsa  munsma

Jani  uka   jiskt’istati

Nayapachawa jan  yatktti

Chuymajaruki amuyam

Jupawa jumatuqi   irpanitu

Jupawa munaña uñachayitu

Jupawa  jumar yäqañ  yatichitu

 Chuymajaruki  amuyam

Lup’iwijampis  armisrismawa

Arujampis   t’unjirismawa

Uñnaqajampis llakisiyirismawa

Chuymajaruki  amuyam

Jupampiwa wali  munsma

 jupampiwa  q’ayacht’sma

jupampiwa  qhumantsma

Chuymajaruki  amuyam

 Jani  tupt’kañw  munsma

Jani armkañw  munsma

Jani  jakt’kañw munsma

Chuymajaruki amuyam

Jan walt’awinakaw  jakawin utjitu

Jaqimp  tuqisiñatakaw wakt’itu

mayja mayjwa   arxayirisma

chuymajaruki  amuyam

 jumasapakita  quli panqarita

jumasapaki  k’ajkir wara wara

jumasapaki   uru qhana

jumasapakitaw jakawijaxa.

---

[1] Estudiante de la carrera de Lingüística e Idiomas (UPEA).